Saturday, September 19, 2009

ورقة و قلم


مِسِك الورقة و خط القلم

الخط خطه و خط الألم

الخط خيطه لخط الزمن

مكتوب في قلبه كل شيء

من يوم ما قلبه كان لسه طاهر

و لحد يوم ما قلبه اتظلم

شاف في القلم كل الألم

و شاف في الألم أصعب طريق

طريق مليان بالذكريات

و فات عليه العمر ساعات

ساعات بيبكي بقلبه دموع

و دموع بتشكي ألم موجوع

و جوه الوجع قلبه ابتسم

ببسمة فيها شيء من ألم

و كأن الألم يوم ما اترسم

عالرسمة اترسم كل الوجود

و لكن مافيش شيء موجود

و كأن الفرح بدون مجهود

موجود معانا ف دمع العيون

و عيون تبص فوق للنجوم

تستنى نجمة فيها الألم

و فيها حاجات أيام زمان

و فيها الفرح معاه اتختم

Wednesday, April 08, 2009

المغربية


عدَّى النهار و المغربية وراه

و عشان نشوف الفجر من بعديها

هنعدِّي بحور من المأساة

هنشوف حاجات متانقضة بين بعضيها

و صوت قلوبنا مش ناسياه

و عشان نشوف الفجر جوه عنينا

هندوس في ضلمة و موت و حياة

و دموع حزينة بسمتنا بتخبيها

و قلوب كتير و ألف واحد تاه


عدَّى النهار واخد معاه الأشواق

سايب حنين و دمع ميت مشتاق

و صوتنا ينده... مايسمعهوش

عدَّى النهار واخد سكاتنا معاه

في المغربية لون حريقة بيترسم

عالمشربية و زخرفتها بتبتسم

بيقوللنا عالليل و جرحه

و إزاي في حزنه متداري فرحه

و إزاي في حضنه بنلاقي شوقنا

و إزاي قلوبنا بتستناه

و ييجي تاني نفس النهار

ما بين ألوان شعاع النار

و تيجي بعده المغربية

و تاني ندور كلنا وياه

Friday, March 27, 2009

المعنى مش في بطن الشاعر


فتحت باب قلبي اللي داب

لقيت عذاب

و سنين عتاب

لقيت مشاعرمتبعترة

لقيت سحاب

بعدين تراب

و حاجات بتوجع من غير حساب

لقيت حيطان ورا كل باب

و دمعة تنزل م القلب حلوة

تبل ريق اللي مرة خاب

لقيت حاجات في الضلمة عايشة

خفاش معشش على الأسباب

طير صغير لكن مكشر

و كاشف سلاحه و ألف ناب

ورود جميلة مليانة شوك

ولد صغير و شعره شاب

كان حلمه دايماً: نفسه يكون

و يحس بحاجات ماحدش عارفها

و يفتح لقلبه طريق في الكون

فتحت تاني لقلبي تاني

لقيت سنين عمّال بعاني

سامع كلامي من غير معاني

لقيت بيوتي متكسرة

و أبواب كتيرة قدام عنيّا

خايف أخش من أي باب

خايف أطلع فوق السحاب

و ألاقي أصلاً كله سراب

Saturday, February 21, 2009

وطن


يعني إيه كلمة وطن

كلمة وطن كلمة بحبِّك

فيها وشوش عايشة المحن

فيها القهاوي واللي ناوي

يقعد في شغله ياخد رشاوي

فيها اللي غاوي يقول حكاوي

فيها اللي ماشي بالمسطرة

و ناس كبيرة صغيَّرة

فيها القلوب الطيبة

و حاجات كتيرة قريبة

فيها الجناين و الكماين

و اللي قلبه غادر و خاين

فيها اللي فات لا عمره مات

و لا عمره خان الذكريات

فيها الحبيب أحسن طبيب

و أي كلمة تمس جرحك

لازم يطيب

فيها الإيدين تمسك في إيدك

في وقت زنقة و في وقت عيدك

فيها اللي رايق و اللي بايخ

و اللي في وسط الزحمة دايخ

فيها الناس بتقول يا ريت

و صوت الأدان لازم بيوصل

لكل حارة و كل بيت

فيها الحبايب و قلب دايب

فيها اللي غايب من سنين

فيها الكلام فيها السكوت

فيها القلوب زي الياقوت

فيها البشر زي الحجر

فيها الشمس ويا القمر

فيها الحروف فيها المعاني

و حاجات كتير مالهاش معاني

فيها إحساس غريب بالزمن

فيها إحساس جميل اتسجن

هي دي كلمة وطن

Wednesday, February 04, 2009

حكاوي في ليل غريب

بتختلف الوشوش

و كل يوم حاجات جديدة

إمشي الحواري

و اسمع حكاوي

يمكن جداً هناك تلاقي

ناس كتيرة

قاعدين بساطى عالحصيرة

روح و شوف في حتة تانية

ناس كتيرة مش هيّ هيّ

ناس و كله عنده قصة

و ميت حكاية مالهاش نهاية

كل حتة و فيها ناس

كل واحد ماشي في حاله

أو مش في حاله

مالكش دعوة.. مالك و ماله

يمكن ساكت لأنه ساكت

أو دنيته مش مرتحاله

خللي الحكاوي تاخدك بعيد

لمكان جديد

يمكن تلاقي قلوب حديد

و إيدين تدوّر على أي إيد

إعرف ساعتها و اسمع بقلبك

الدنيا دي يدوب أحلام

و كل الناس عايشينها كدة

قلوب مش متأكدة

مش حاسة برضا

و كله بعد الأوان ما يفوت

و يا دوب قبل الصباح ما يفوت

بتيجي لحظة ماليها سكوت

فبها الحقيقة كلها

من غير تزويق أو منجَهَه

فيها الحقيقة كلها

و الناس تداري وشها

فيها الحقيقة كلها

و عنين تزغلل من الدموع

و فجأة تبكي من نفسها