آخر كلام

ورقة و قلم

2009-09-19T17:36:00.002+02:00

مِسِك الورقة و خط القلم

الخط خطه و خط الألم

الخط خيطه لخط الزمن

مكتوب في قلبه كل شيء

من يوم ما قلبه كان لسه طاهر

و لحد يوم ما قلبه اتظلم

شاف في القلم كل الألم

و شاف في الألم أصعب طريق

طريق مليان بالذكريات

و فات عليه العمر ساعات

ساعات بيبكي بقلبه دموع

و دموع بتشكي ألم موجوع

و جوه الوجع قلبه ابتسم

ببسمة فيها شيء من ألم

و كأن الألم يوم ما اترسم

عالرسمة اترسم كل الوجود

و لكن مافيش شيء موجود

و كأن الفرح بدون مجهود

موجود معانا ف دمع العيون

و عيون تبص فوق للنجوم

تستنى نجمة فيها الألم

و فيها حاجات أيام زمان

و فيها الفرح معاه اتختم

المغربية

2009-04-08T10:20:00.001+02:00

عدَّى النهار و المغربية وراه

و عشان نشوف الفجر من بعديها

هنعدِّي بحور من المأساة

هنشوف حاجات متانقضة بين بعضيها

و صوت قلوبنا مش ناسياه

و عشان نشوف الفجر جوه عنينا

هندوس في ضلمة و موت و حياة

و دموع حزينة بسمتنا بتخبيها

و قلوب كتير و ألف واحد تاه

عدَّى النهار واخد معاه الأشواق

سايب حنين و دمع ميت مشتاق

و صوتنا ينده... مايسمعهوش

عدَّى النهار واخد سكاتنا معاه

في المغربية لون حريقة بيترسم

عالمشربية و زخرفتها بتبتسم

بيقوللنا عالليل و جرحه

و إزاي في حزنه متداري فرحه

و إزاي في حضنه بنلاقي شوقنا

و إزاي قلوبنا بتستناه

و ييجي تاني نفس النهار

ما بين ألوان شعاع النار

و تيجي بعده المغربية

و تاني ندور كلنا وياه

المعنى مش في بطن الشاعر

2009-03-27T01:45:00.002+02:00

فتحت باب قلبي اللي داب

لقيت عذاب

و سنين عتاب

لقيت مشاعرمتبعترة

لقيت سحاب

بعدين تراب

و حاجات بتوجع من غير حساب

لقيت حيطان ورا كل باب

و دمعة تنزل م القلب حلوة

تبل ريق اللي مرة خاب

لقيت حاجات في الضلمة عايشة

خفاش معشش على الأسباب

طير صغير لكن مكشر

و كاشف سلاحه و ألف ناب

ورود جميلة مليانة شوك

ولد صغير و شعره شاب

كان حلمه دايماً: نفسه يكون

و يحس بحاجات ماحدش عارفها

و يفتح لقلبه طريق في الكون

فتحت تاني لقلبي تاني

لقيت سنين عمّال بعاني

سامع كلامي من غير معاني

لقيت بيوتي متكسرة

و أبواب كتيرة قدام عنيّا

خايف أخش من أي باب

خايف أطلع فوق السحاب

و ألاقي أصلاً كله سراب

وطن

2009-02-21T16:21:00.001+02:00

يعني إيه كلمة وطن

كلمة وطن كلمة بحبِّك

فيها وشوش عايشة المحن

فيها القهاوي واللي ناوي

يقعد في شغله ياخد رشاوي

فيها اللي غاوي يقول حكاوي

فيها اللي ماشي بالمسطرة

و ناس كبيرة صغيَّرة

فيها القلوب الطيبة

و حاجات كتيرة قريبة

فيها الجناين و الكماين

و اللي قلبه غادر و خاين

فيها اللي فات لا عمره مات

و لا عمره خان الذكريات

فيها الحبيب أحسن طبيب

و أي كلمة تمس جرحك

لازم يطيب

فيها الإيدين تمسك في إيدك

في وقت زنقة و في وقت عيدك

فيها اللي رايق و اللي بايخ

و اللي في وسط الزحمة دايخ

فيها الناس بتقول يا ريت

و صوت الأدان لازم بيوصل

لكل حارة و كل بيت

فيها الحبايب و قلب دايب

فيها اللي غايب من سنين

فيها الكلام فيها السكوت

فيها القلوب زي الياقوت

فيها البشر زي الحجر

فيها الشمس ويا القمر

فيها الحروف فيها المعاني

و حاجات كتير مالهاش معاني

فيها إحساس غريب بالزمن

فيها إحساس جميل اتسجن

هي دي كلمة وطن

حكاوي في ليل غريب

2009-02-04T10:04:00.000+02:00

بتختلف الوشوش

و كل يوم حاجات جديدة

إمشي الحواري

و اسمع حكاوي

يمكن جداً هناك تلاقي

ناس كتيرة

قاعدين بساطى عالحصيرة

روح و شوف في حتة تانية

ناس كتيرة مش هيّ هيّ

ناس و كله عنده قصة

و ميت حكاية مالهاش نهاية

كل حتة و فيها ناس

كل واحد ماشي في حاله

أو مش في حاله

مالكش دعوة.. مالك و ماله

يمكن ساكت لأنه ساكت

أو دنيته مش مرتحاله

خللي الحكاوي تاخدك بعيد

لمكان جديد

يمكن تلاقي قلوب حديد

و إيدين تدوّر على أي إيد

إعرف ساعتها و اسمع بقلبك

الدنيا دي يدوب أحلام

و كل الناس عايشينها كدة

قلوب مش متأكدة

مش حاسة برضا

و كله بعد الأوان ما يفوت

و يا دوب قبل الصباح ما يفوت

بتيجي لحظة ماليها سكوت

فبها الحقيقة كلها

من غير تزويق أو منجَهَه

فيها الحقيقة كلها

و الناس تداري وشها

فيها الحقيقة كلها

و عنين تزغلل من الدموع

و فجأة تبكي من نفسها

سكوت

2008-11-01T01:29:00.003+02:00

في وسط سكوت...
ما بين الليل...
و لما الشجر بيحاول يطلع صوت
و ايدين تمد و تقفل الشبابيك
تداري جوه منها قلوب بتموت
و يمشي هو وسط طريق...
ماليه الضيق...
في وسط سكوت
و وسط الليل
يجيه و جه طفل برئ
ببسمة حلوة و قلب مضئ
ويمسح دمعته في سكوت
و وسط الليل
في عز الصمت
تلاقي ناس بتكتب حروف من نور
عينيهاتصحى لما الصباح بيفوت
و يلقى الطفل من تاني
و يجري عليه و يندهله
و مع إنه ساير على مهله ما يلحقهوش
و يمشي تاني في وسط الليل
تطارده و حوش
يطارده الوقت لما الناس كانوا ما بيحسوش
و ينده اسمه من تاني
يجيلو بس صوت الصوت
و يرجع تاني يعيش في سكوت
كانه لسة زي زمان
يا عيني بين الحياة و الموت

بداية و نهاية

2008-10-08T00:52:00.003+02:00

زمان كان نفسي أكبر

كان نفسي جداً أبقى كبير

و نفسي أطير

كان نفسي أحب الدنيا أكتر

و أشوف قلوب متلونة

بلون يليق مع الأخضر

و لاقيتني باكبر

و الوقت فات

فاضل ساعات

فاضل ثواني

كبرت تاني

ما فاضلش تاني عشان أعيش

عدت سنين

و الوقت ماشي ماستنَّنِيش

فاتت حاجات

و ذكريات

عاشت و ماتت حاجات كتير

و اتغيرت حاجات كتير

و كأن أصل الدنيا التغيير

و الدنيا صغرت

و كبرت أنا

كأن عدت مليون سنة

و كان اللي كان

و لا عادش فيه حتى زمان

كل حاجة

2008-09-18T16:08:00.003+02:00

لسة الطابور طويل

واقفين فيه كلنا

بس عقبال ما نوصل هناك

نتعرف على بعضنا

أهلاً و سهلاً... أنا الإنسان

أنا الشعب الغلبان

أنا هنا من زمان

و غالباً هموت هنا

أنا الأمنية

و لحن الغربة في الأغنية

أنا ذكريات من زمان

و أنا المرجيحة

طعم الصبا و حاجات مريحة

أنا الفانوس في رمضان

أنا موضوع اترسم مبوظاه الألوان

أنا كل الناس

و أنا الإحساس

أنا السر و أنا الترباس

أنا إيد بِتِدفَى على دخان من المدخنة

أنا الحاجات الممكنة

و قلوب الناس المؤمنة

أنا العيشة و المعيشة

و اللي اتكتب بطرف الريشة

أنا الذل و المسكنة

و الحروف المتلخفنة

و حق ضايع من زمان

كأنه من ستين سنة

أنا المفتاح

و نفسي أرتاح

و لسة الطابور طويل

بس أنا صوتي راح

حكايتنا

2008-08-06T00:33:00.002+02:00

إيه الحكاية

إمتى بَدِت صفحاتها..

و إزاي هتبقى النهاية

إمتى هنتعب منها و يصرخ الكون كفاية

كِبِر الزمن و الناس و لسة أنا جوايا

شايف حطام من نفسي بين حطام المرايا

بين حواري المحن و بين شوارع أسايا

في ساحة المعركة في وش كل الشظايا

لقيتني هناك أنا.. و لقيت هناك منتهايا

سايب ورايا سنين كتير.. سايب حبي و منايا

شايل في عيني الدموع.. و الأعظم كان في الخفايا

دموع على خد القمر

2008-07-22T18:56:00.001+02:00

لسة فاكر صوت خيالك
و بسمة منك حلوة طالعة
و صوت حكالي ألف قصة
بتداريهم ألف دمعة
لسة حاسس نور عينيكي
و دنيا تانية باعيشها فيكي
و ألاقي ضحكة بتعلا بيكي
و رغم نورك و بسمة منك
لسة شايف دمعتك
ماتعيطيش لو ليكي خاطر
لو بينك و بيني سور
لو بينا سنين مخاطر
إندهي إسمي تلاقيني
بين إيديكي و ليكي طوع
و ليكي قلب و ليكي حضن
و ليكي خد وقت الدموع
طلعي الضحكة البريئة
خللي روحك فيها تظهر
و فيها ورينا الحقيقة
طيري ويا الكون براحتك
ما تسأليش أخبارنا إيه
عيشي في الأفراح لوحدك
أو معانا أو بغيرنا
المهم تبان غلاوتك
المهم يجف دمعك
و تلاقي حتة فيها قلبك
فيها حقك م الحنان
فيها حد يخاف عليكي
و ياخد ضوء القمر
و يمسح دموع عنيكي
و تكوني زي ما إنتِ.. إنتِ
و تلاقي جنة حزاء دموعك
و تسكني ف قلبي و مدينتي

لا تنكسر

2008-06-27T11:25:00.003+02:00

لا تبكي وسط الناس

داري قلبك و الإحساس

لا تنكسر

و لا تنقهر

و لا تكون للضعف مداس

خللي الدمعة جوه العين

لا تخلليها تشق طريقها

أو تفتحلك باب لحنين

لا تنطوي

خلليك قوي

خلليك دايماً في العايشين

و امسك و اشكُم و احكم روحك

داوي بصبرك كل جروحك

و وسط الزحمة لا تنهار

أو تستنى ييجي نهار

ممكن ييجي أو مايجيش

ممكن ضلمة فيها نعيش

ممكن تخسر.. ممكن تزهق

ممكن تتعب م المشوار

حتى الدنيا لو تنفجر

و إنت ف وِدك لو دمعتك

من فوق خدك راح تنهمر

لا تنكسر

حجَّر عينك و استمر

دا الدنيا دي غابة و احنا غلابة

و إيه جاب كتاكيت جنب ديابة

دا الدنيا دي دم و حرب و ساحة

مافيش للدمع فيها مساحة

مافيهاش عنوان للي انكسر...

لا تنكسر

تلات إربع و نص

2008-05-21T20:38:00.004+02:00

سؤال...

ليه حاسس إني غريق؟

مش عارف أعوم.. و بَطَبِّش

و محدش شايف إني غريق

ليه لما الدنيا بتفتح باب

بالاقي سراب؟

ليه كل ما أحاول أكتب

مالاقيش أوراق و لا مكتب؟

مالاقيش حد ف أي حتة

و لا حتة ف أي حاجة

ليه لما أحاول أحب

مالاقيش الحب

مالاقيش في الدنيا شيء يتحب

و أحاول أقوم..

أتكعبل

و أبدأ م الأول..

أستهبل...

و أجري و أصرخ

و أضحك و أبكي...

و أحس إن الدنيا فوق أكتافي..

و أنزل حافي

و أشد لحافي لأجل أنام

طب ليه أحلامي مافيهاش أحلام؟

وليه الناي صوته حزين؟

و مافيش قافية لكلمة مانجة..

غير لحن كمنجه

طب والبنزين؟

مين هيحطه؟

و سور الحزن...

مين هينطه؟

طب ليه الإحساس؟

و ليه الناس؟

وليه الدم ف طرف الفاس؟

و ليه الأمل؟

و إيه العمل في وجع الراس؟

و إيه الكلمات؟

و إيه الأشعار؟

و ليه القط بياكل الفار؟

و مين هيموت و مين هايعيش؟

و مين راح ياكل جبنة و عيش؟

و أنا لو مُت مين راح يبكي؟

أو لو عِشت مين راح يشكي؟

و مين بيصدق أي كلام؟

و مين طب عايش في الأوهام؟

و إيه البدلة و الجلباب؟

و ليه العلم مش ف كتاب؟

و ليه إللي قُلته..

و بدمعي كتبته..

مالهوش عند حد أي جوابــــــــــــــــــــــــــــــــــــــــ...

عاشق

2008-05-10T11:15:00.001+02:00

ثوبها أبيضٌ و قلبها ألوان

أهلاً بها هنا في ملحمة الألحان

في صراعٍ يقتلني كل يوم

و يسلبني الأمان...

هل أحبها؟

أم أعشقها؟

أم أنني ولهان؟

أم أني قد ذبت سريعاً

و وقعت أسيراً

في سجن بلا قضبان؟

أشتاق إليها..

عجباً شوق المسجون إلى السجان

هي قلبي

هي روحي

هي ما يعطيني كيان

هي لحن الحب و معناه

هي عين حنان

هي ذكرى أحلى زمان

نورٌ من بين ظلام

و شفاء للأسقام..

أمي يا نور الأيام

يا نشيد العشق الأبدي..

يا بريقاً في الأكوان

عذراً أمي.. فأنا الإنسان

و شِعري محدود بالكلمات..

تخلوه النغمات

ترويه سنين من عشق..

تسقيه النظرات

تسكنه زهور و ورود..

و وقار ليس بمحدود

فعذراً إليكِ.. إقبليه

فلقد وضعت عمري فيه..

جئت و يملأني الرجا..

أن تقرأيني فيه

غصب عني

2008-03-11T22:02:00.003+02:00

إذرفي دمعك علينا و لا تواسينا

دمعة على حاجات كتيرة ما باقتش فينا

على أمة ماتت من زمان

بِسهم الإهانة ف قلبها

و ف ضهرها سكِّينة

أمة ما عادتش أمة

عايشة في ظلام الغمة

في وسط عالم ما بيحكموش

و لا حب البشر و لا ذمة

إبكي و خللي الدموع أنهار

من طُهر الفرات للنيل

و لحد ما تلاقي نهار

إبكي بدموع من حروف

بكِّي من دمعِك ألوف... و فكرينا

فكرينا بفلسطين

بدبابات و طيارات

و ناس رصاصاتها من طين

بأرض بتضيع من إيدينا

و عهود قلناها من زمان

إن بلادنا في عنينا

إبكي تاني و إبكي كتير

على طفل داق طعم السعير

على المجزرة

على بيت في شارع بقى مقبرة

خدي من دموعنا و ابكي علينا

أشلاء ولادنا بقت علامة

على باب تاريخ مليون مدينة

في القدس غزة و ف جنين

بغداد و دم الملايين

لبنان و بيروت بتنادينا

من شرق آسيا و لحد سينا

إبكي كمان لكن خلاص

تعب البكا منا خلاص...

أعذرينا

آخر كلام

2008-02-26T13:08:00.002+02:00

خلص الكلام.. ماعادش فيه معاني

ما عادتش فيه حروف

تِتقال في الأغاني

ما عادش فيَّ حاجة

يا دوب شوية سذاجة

يا دوب أحلام

يا دوب أوهام

ما عادش فيَّ صحة عشان أنام

و إن صحيت بافتكر

قلوب كتيرة بايعاني

و حاجات كتيرة وجعاني

و ذكريات زمن الورود

بس الورود بتعاني

صدقت شِعري و همستي

و أخدت مِالدنيا حصتي

لقيتها كدبة و خادعاني

أتاري الوشوش وشوش

و ناس في قلوبها وحوش

ما بيحبوش

ما بيحسوش

حتى إللي كان مرة حبيب

و مني قريب

أصبح في غربة.. أصبح غريب

كل الكلام ما فيهوش معاني

مافيهوش نغم و لا فيه شجن

و لا فيه تناغم و لا حب الوطن

و مهما كتبت، كلامي ده فاني

بافكر خلاص.. ماهاكتبش تاني

في حبك يا بهية

2008-02-03T08:56:00.000+02:00

في العشق بكون مجنون

كتير باعشق بجد و جنون

و النهاردة أنا حبيت

أغرب حب ف تاريخ الكون

باعشقك من كتر كُرهي ليكي

و برغم العماص ف عنيكي

باعشقك

و باعشق كل حاجة فيكي

بتربطني بيكي علاقة غريبة

سعات بألاقيكي وِحشة

وكتير بتبقِي حبيبة

يا مصر يالي مجنناني

كل حاجة فيكي مخلياني

تايه في سجن حبك

بطريقة مبهدلاني

كل حاجة فيكي حلوة

وِحشة و برضه حلوة

صوت الزعيق و الصويت

في وداني بيبقى غنوة

ماقدَرش أعيش بيكي و من غيرك

أعيش على نقطة من نيلك

وأموت لو كَلت من خيرك

يا مصر يا كلمة فيها الكتير

شاغلة بالي عني

واخدة قلبي مني

و حطاني ف موقف خطير

بحبك يا عجوزة و يا خطيرة

مَلَاك و الساحرة الشريرة

بحبك يا غنية و يا بهية

يا جميلة و يا غبية

يا كل حاجة في الدنيا ديَّة

و محيّراني..

يا ترى هل إنت عقاب..

و لّا من ربي هدِيّة

رسالة

2008-01-26T23:39:00.000+02:00

من غير مؤاخذة و من غير عتاب

إسمعني يا خويا و افتحلي باب

أعتذرلك منه

وأكتبلك عليه آه من عذاب

أنا آسف ياخويا من كل قلبي

آسف لأني خُنت حبي

ما عملتش أي حاجة ف شدتك

و لا أي صوت صرخ بقوة لنجدتك

سامحني يا خويا سامحني بجد

سامحني لأني ف أزمتك

كنت زي أي حد

سامحني لأن الكلمة طالعة من جوة

سامحني لأن فيَّ ما عادش فيه قوة

و ماتكتبش الكلام من الخوف

ناقصة و واقعة منه حروف

و أنا ما اختلفتش رغم الظروف

رغم سجنك و الألوف

ما قولتش حتى كلمة حق

ما قولتش وقت الشدة لأ

و مهما قلت و مهما كان

أنا هنا في مكان أمان

أنا هنا و كراستي و القلم

و إنت ما بين حصار و ما بين ألم

واقف زي الجبال بتحميني

بتحمي دمي و أرضي و ديني

و في الختام سامحني يا خويا

مافيش كلام يجيب المعاني

من قلبي لقلبك فيه كلمتين

كلمة شجاعة متلخصة بين ضفتين

وكلمة تانية طالعة مني بالمعزَّة

ليك يا خويا خلف سور الحصار في غزة

أبجد

2007-12-29T19:15:00.000+02:00

إكتب و لو حتى حرف

مسير الحرف يبقى كلمة

كلامك ده وقود للهمة

إحكي عن كل الظروف

من غير أي خوف..

إحكي عن أوقات الحروب

عن ناس عايشة جوة الكهوف

ما فيهاش حياة

ما عادتش سامعة و لا بتشوف

كفاية كلام عن السلام

بلاش أوهام

مافيش عالغصن واقف جوزين حمام

و لو حروفك عجِّزت.. إكتب كمان

إبدأ إجري بكلمتك

علِّي بيها همتك

مضى خلاص زمن الوقوف..

فيه وحوش إتحركت وسط الحروف

فيه حاجات إتغيرت رغم الأنوف

و واحدة واحدة..

حروفك هتكتر.. وتبقى ألوف.

خسارة

2007-12-21T12:49:00.000+02:00

يا خسارة على حاجات كتيرة

كان نفسي أقولها و ما قولتهاش

و ناس كتيرة ما كلمتهاش

يا خسارة على الأيام..

عدَّت عليّ و ما عشتهاش

و فات الأوان..

كل واحد راح لحاله

ما كان من زمان..

يا قلبي تعترف

و تقول من زمان.

تعترف بحبك أو بالأسف

فات الأوان

كان إللي كان

مات إللي مات و عاش إللي عاش

و ف قلبي عاش

كلام كتير كان نفسي أقوله

خسارة يا قلبي كان ليك تطوله..

خسارة يا قلبي كان ليك تعيش

خليك فكرها..

دموع كتيرة ما بتتنسيش

و حروف كتيرة ما قولتهاش

ما تلومش إلا نفسك

ما تلومش إلا قلبك..

خليك فاكرها و متنسهاش

بخير الحمد لله

2007-12-12T17:57:00.000+02:00

لسة الورود متفتحة و فيها لون

لسة فيه رمش و جفون

لسة فيه صوت النسيم

لسة فيه إحساس عظيم

لسة فيه حاجات

و ذكريات من اللي فات

لسة فيه حكايات

لسة فيه شمس و قمر

لسة المطر

لسة الناس قلوبها حلوة

لسة غنوة

لسة صوت الديك بيدّن

و حاجات كتيرة حلوة جداً

لسة فيه حياة

و صوت قلوبنا سامعاه

بيقولّنا على بكرة جَي

لسة فيه ضَي

و يقولنا بصوت بشير..

لسة الدنيا فيها خير

ألف سؤال مجنون

2007-12-08T02:31:00.000+02:00

أكون أو لا أكون..؟

أعيش و لّا لأ؟

أفضل ساكت و ساير...

ولّا أقول الحق؟

أنا أبيض و لّا إسود..

ولّا فيّ الف لون...؟

أكون أو لا أكون...

ألف سؤال مجنون

صَحّى قلبي في الليالي..

بكَّى عيني و خلّهالي..

تايهه ف غربة الكون.

أكون أو لا أكون..؟

لسة الدمع جوة العيون؟

و لّا الفرح بقى يتعزف..

على وَتَرِين من قانون

عايش في وسط دوشة...

و لّا راضي بالسكون؟

أكون أو لا أكون..

ألف سؤال مجنون..

ألف سؤال مجنون.

أعقاب سجاير

2007-11-27T21:23:00.001+02:00

في الشوارع في الحواري في المولات..

في كل حتة موجودين.

مترميين و منداسين

و مفعوصين تحت الشباشب

معندهمش أي صوت..

يقولو للماشي حاسب

مفحوتين و مطحونين..

مالهومش لزمة

ولا في الرخاء و لا وقت أزمة.

خانقين علينا و مخنوقين.

متفعَّصين.

متقطّعين.

باصِّين في وش كل واحد..

ما هما مرميين عالأرض..

مهريين مِالضرب.

زهئانين من الكرب.

غلبانين و متمسكنين.

أنا مش باوصف أعقاب سجاير..

أنا باوصفنا إحنا.. البني آدمين.

زمن الرجالة -- إهداء من الأسد العجوز

2007-11-25T01:34:00.000+02:00

كان يا ما كان.. كان في حاجة إسمها رجالة

أيام الفرسان و الخيالة

أيام ما كان لسة فيه الفتوة

شايل نبوته على كتفه بقوة

أيام ما كان في حاجة إسمها السيد

يحكم بيته و يتقالّه يا سي السيد

و كان فيه كمان راجل هلفوت..

لكن برضه كان شايل نبوت

بيدافع عن عرضه و يقول توت توت

و كان فيه برضه الظالم و المفتري

بس الظلم كان بيروح..و بيفضل القوي

دلوقتي ما بقاش غير شعر بيقولوا عليه شنبات

و عيال بتقول خد و هات

و رجالة عايئة بتبرم شنباتها

و رجالة تايهة من غير نبابيتها

بس ماتقولش رجالة.. قول لا لا لا لا

ما خلا ص راح اللي راح يا رجالة

فتح الباب

2007-11-25T01:29:00.000+02:00

هجمت عليّ همومي

مخلوق مخيف بسبع أنياب

كل حاجة عايشة ضدي

محدش عامللي أي حساب

محدش حاسسني و لا أصلاً فاهمني

ما فيش فيَّ حب و محدش كارهني

أنا مش فاهمني

و ف قلبي ساجنني

و جوايا ميت مليون كتاب

أنا كل واحد فينا

أنا كل إنسان مغلوب

أنا أي حد حس ف مرة إنه خاب

أنا أي حد ساكت و عايش في السكون

أنا أي حد أمله إنه يفتح باب

أحلام الطفولة

2007-11-20T00:41:00.001+02:00

و احنا صغيرين قالولنا نعيش في الخيال

ما احنا مش فاهمين..

يعني.. لسة عيال.

عادي نحلم و عادي نسأل..

ما كانش فيه شئ محال.

و كبرنا.

و بقى عندنا عشرين سنة..

و شفنا الدنيا فيها الهنا.

فيها الكناس و الشيّال..

فيها المحتال

فيها الفارس و الخيال.

و ناس نايمة و ناس ماشية..

فيها ناس تايهة و ناس راسية.

و موتيسيكلاااات..

و نااااس...

و عربيات ماشية في الحارة اليمين..

و فجأة تكسر شمال.

فيها بتتحطم الآمال.

و ناس غرقانة ف دم و عرق..

و غصب عنها علشان تعيش..

ضميرها اتسرق.

و كل واحد متحيّر.

كل يوم بحالة و متغيّر.

صحيح الدنيا حلوة..

بس يا ريتني فضلت صغيّر.

حدوتة

2007-11-14T20:41:00.001+02:00

بِندُور في حواريها

من حدوتة لحدوتة...

قصص ف قلوبنا منحوتة.

ما هي أصل الدنيا صغيَّرة.

مين كان يقول إن دروبنا هتلتقي..؟

بقالنا كتير.. و آدي القَدَر

زي إمبارح كنا تحت المطر.

و آدي الحياة..

دارت الدنيا و رجعنا لبعضنا..

و آدي حضن الحياة بيضمنا

أنا كنت فاكرك طول السنين

شكلك ما كانش واضح في ذهني..

بس لو شفتك هعرفك بين ملايين.

و لو شفتك ماقدرش أكلمك.

و مش هاقرَّب..

يدوب علي قلبي يرسمك.

ياه.. بقالنا قد إيه!

عشَر سنين؟

يمكن أكتر..

بس إنت زي ما إنت.

بس يمكن بقيتي أكبر.

يمكن بقيتي أَدرَى بدورة الحياة

يمكن عرفتي أكتر باللي كل واحد أساه.

و عرفتي برضه إن لقانا مش دليل على شئ

ممكن بكرة نفترق و نضل الطريق.

و حان وقت الوداع.

في سكوت..

مالهوش أي صوت..

و لا بالكلام..

ولا بالعيون..

ولا بالدموع.

و ممكن مايكونش أصلاً وداع..

ولا كان في لُقا..

و لا كان في أي شئ..

إلا ذكرَى..

و توتة توتة.

أي كلام

2007-11-10T23:52:00.000+02:00

في دماغي وَش.

جوايا حيرة و ميت سؤال.

أحلام كتيرة و قُصر بال.

دبَّان في مخِّي مابيِتنَش.

حروف كتيرة مابتتقالش.

قفص بلاستيك و قِفله هَش.

و قشعريرة مليا جسمي

منسياني حتى إسمي

أجيب ف سيرة و أفُض سيرة..

و كله زَيِّي مابيفهمش.

آدي القصيدة

و لو إنت مافهمتهاش..

أبوس جبينك ما تسألش.

ما تفتييييش

2007-11-04T01:11:00.001+02:00

لو سمحت..

هو الطريق منين؟

شمال أو يمين؟

أطلع فوق يا عم

ولَّا أنزل تحت؟

آه ما أنا رُحت الشارع ده

بس كان مسدود

كان فيه ناس دموعها واقفة عالخدود

..طب أَلِف الميدان؟

لأ ده باينلُه نفس المكان.

أنا شاكلي تايه.

بَلِف ف دواير.

و كل خطوة بامشيها..

بتزيد في الخساير.

.. طب حد معاه خريطة؟

إنت عارف؟.. ولّا بتزيط في الزيطة؟

ما بحبش إللي بيفتي.

كفاية هموم شايلها..

كفاية أحزان على كتفي.

ده أنا بس كل إللي عايزه.. لقمة عيش.

و أي حد يدلّني.. يا ريت ما يفتيش.

قبل الشروق

2007-10-30T00:14:00.000+02:00

صحيني الساعة خمسة

أصل المنبه بتاعي مكسور

صحيني قبل الشمس ما تصحى..

قبل كل الناس ما تصحى

نفسي أشوف شكل الدنيا من غير نور.

أكيد هيّ أحلى..

و الخير بيها أولى..

من كل شر مستطير.

الصُّبح كل حاجة بتبان.

آدي الغني و أهو الغلبان.

و آدي اللي واقف في الطابور.

ما فيش حاجة بتستخبَّة.

كله على الأرض ف حجم حبَّة..

و كله ف دايرته بيدُور.

إللي عايز يقول بيقول.

و إللي ساكت ساكت.

عمره ما قال و لا هيقول.

الحرامي إتمسك.

و آدي إللي حقه إتهتك.

و آدي إللي حاله مستور.

صَدَق إللي قال من زمان..

كله مكشوف في النور.

يا رب

2007-10-20T01:17:00.003+02:00

يا رب إنت عالم بحالي

بقدرتك يا قدير

تقدر تغير كل أحوالي.

يا خالق كل شئ..

و مخللي ف كل شئ..

شئ من بَلاء..

صَعب عليّ الإبتلاء.

غيّر لي أحوالي.

عايش في نعمتك..

و ناسي كلمتك

و بحكمتك و قدرتك أنا لسة موجود..

مليان عيوب..

غرقان في الذنوب.

و لسة واقف على باب رحمتك..

غّير لي أحوالي.

خليني أشوف لمحة من صلاح..

لسة في أمل؟

ولا كل الأمل راح؟

إمتى يا ربي هبقى مرتاح؟

يا رب أنا خونت عهدك..

و كنت خاين نعمتك

أنا بين إيديك ذليل..

قلبي خاشع لقوتك..

عيني مذلولة ف عزتك..

إقبلني عندك يا رحيم..

و برحمتك..

إكتب إسمي ف جنتك.

لون جديد

2007-10-11T17:13:00.000+02:00

النهاردة عيد!

و كانت هديتي منه..

لون جديد.

و نظرة تانية للحياة..

مش بس بَص على المأساه

لأن فيه وجه تاني..

الوجه السعيد.

و مع قدومه العيد قاللي عالأمل..

كلمتين حب و زجل..

و مشاعر ف شكل تاني..

و إحساس من نوع فريد.

كل واحد منا بيفرح..

و أنا بفرحتي فرحان..

و دة حال كل إنسان.

مين فينا ما فيهوش البسمة؟

مدفونة..

عايشة جوة ف مكان بعيد..

مهما كان قلبك حديد..

جواك حتَّة من رسمة..

ولما تجِف كل حاجة..

هتلاقي على قلبك النسمة..

بتقول و ماليها شوق..

أهلاً و سهلاً بيك..

أهلاً بِلُون العيد.

أنا الشهيد

2007-09-30T00:13:00.000+02:00

مش نادمان على أي حاجة عملتها
و لا إني مت ف سبيل الله.
و لا إني عشت لفكرة عرفتها..
و فهمتها..
و عشان إيماني بيها سبت الحياة.
أنا إللي مش ممكن أبداً أموت
لأإني هنا في مكان جميل
مليان جواهر مليان ياقوت..
ملين حاحجات كتيرة بحبها.
أنا هفضل عايش ف قلوب الناس
و ف كل حتة عشت فيها..
و ف كل حتة رحتها
أنا إللي دمي كان سطور..
كتبها و بحروف من نور..
قصص بطولة مُخلَّدة.
أنا إللي روحي كانت فِدا.
و عشان إلهى طلبها مني.. قدِّمتها.
و إنتي يا أمي ما تزعليش..
أنا مش قولتلك قبل ما أمشي..
"لازم ها عيش.."
و فيها إية لو روحي كانت هيّ التمن..
و فيها إيه لو قلبي خلِّدته طول الزمن.
يا أمي..
ضحيت عشانك و عشان ولادك
ضحيت عشان الظلم خَد بلادك
يا أمي..
ما تروحيش عند قبري..
سيبيه وحيد..
ما تذرفيش عنده الدموع..
ما تقِيدِيش في ذكراىَ الشموع..
بس احكي عني للشباب..
صحِّي بيَّ شعب غاب..
و قوليلهم نفسي أرجع للدنيا تاني..
و أتقِتِل ألف مرَّة بسيف حديد..
و روحي تكون تاني الفدا..
قوليلهم إني أنا الشهيد.

قلبي معاك

2007-09-21T16:51:00.000+02:00

أنا عايز أقولك و بصراحة

بس حط همّك على جنب

و خدلك من الدنيا استراحة.

و اعذرني لو كلامي غريب

أو مايجيش غير من قريب

بس خد منّي كلامي..

كأنه من حبيب لحبيب:

قلبي معاك.

و حاسس بكل حاجة شاغلاك

و همّي هو همّك..

و اللي جوايا جواك.

قلبي معاك.

و كل كلمة مكتوبة طالعة من قلبي..

من قلب قلبي

و كل حرف منها جَس نبضي

أصلك إنت مهما كان برضه صاحبي.

من نظرة عينيك بشُوف كل حاجة..

ماتقولش حاجة..

من غير ما تتكلم.. عيني سامعاك.

من غير ما تتألم.. روحي حسّاك

أصلك إنت مهما كان برضه صاحبي.

و شِق قلبي.

و نور حياتي و كل حبي.

دة احنا بينّا عِشرة سنين..

وكل يوم فيهم لوحده بسنين.

و ف كل لحظة كان قلبي معاك

مشغول بهمّك..

فرحان لفرحك..

و ف كل خطوة كان خطوة وراك.

ما تستغربش يا نص نفسي..

مش كل الحب مجنون و ليلى..

مش كله لازم يبقى رومانسي

دة المولى سبحانه وصّى عليك

و ديني قاللي أبقى أخوك.

و إن قلبي يبقى معاك.

و أملي إن في الجنة تبقى..

زي ما في الدنيا قلوبنا..

و تبقى إنت يا صاحبي صاحبي..

و يبقى برضه قلبي معاك.

دقيقة واقع

2007-09-17T17:13:00.000+02:00

الواقع بتاعنا خشن زي الحجر..

حقيقة ما منهاش مفر.

طريق حياتنا..

من يوم ما جينا ليوم مماتنا..

بقى أصغر ممر.

مخدوعين ف شكل بكرة و لون بشرته

متشعلقين بخيط و فتلة..

و مشكوكين بإبرته.

آدي الشباب ملطوعين في الشوارع

مش هامهم أي كلمة و لا شرع شارع.

آدي الغني و آدي الفقير

دة عايش كدة و دة عايش هنا..

و الفرق بينهم أصبح كبير.

آدي الوشوش المتكتفة

من غير سلام من غير كلام..

و لا حتى ابتسامة متكلفة.

قاعدين..

مستنيين أي حاجة تهزنا.

أي شومة تدق راسنا..

وتفوقنا من وهمنا.

واقفين مكاننا من غير حراك..

في واقع ما منهوش فكاك.

في صورة متبروزة ببرواز رخيص

فيها ناس بتستهبل..

وفيها ناس بتهيص.

آسف إن كان كلامي عن واقعي..واقعي

و لكن هو دة حالنا

و مالنا بقى كل انشغالنا

و دماغنا سايقة ف هَبَلنا

و هي دى الحقيقة..

و هو دة للأسف كل واحد فينا.

و هي دي حياتنا

وهو دة واقعنا..

و دة ملخصه في دقيقة.

إنسان غير كامل

2007-09-03T19:50:00.000+02:00

بقالي كتير بَلِف و أدُور
قاعد حيران مش عارف أنام
بسأل إمتى هييجي الدور
و أعرف نَفسي..
جوايا.. و ألاقي النور.
أفهم سرّي و أحطم
قيود مسكاني و ألف سور.
أعرف بس إيه اللي فيَّ
شوك و وحوش..
ولاّ زهور.
و لاّ إيه بالظبط عايش جوايا..
و واخده معايا..
فكرة خير و لاّ بس خطايا.
نفسي أفهم قلبي و أقول..
و أتكلم وياه و نقول
و أعرف من كلامي..
إن كنت سائل أو مسئول.
و لاّ الخوف ملكني خلاص
و وقع الفاس من زمان..
و شق طريق في الراس.
و لاّ لسة الأمل موجود..؟
عايش في نفسي من غير قيود
مات و لاّ لسة؟
لسة همسة؟
لسة فكرة؟
و لاّ راح م الوجود.
لسة فيَّ أي حاجة؟
أي نقطة أي حاجة؟
و لاّ جفِّت كل حاجة..
و ما بقاش إلا السكوت.
ما بقاش إلا ثانية..
مستنّيها عشان أموت...
عشان أعيش.
و لاّ الحكاية زي ما قالوا
من زمان ما بتتنسيش.
و لسة جوايا السؤال
و طول ما أنا عايش..
هيفضل معايا...
هيفضل معايا.

إلى مُغترب

2007-08-23T13:46:00.000+02:00

إزيك.. إنت فين

واحشني.

بعيد بقالك قد إيه..

و لا لحظة مفارقني.

بعيد عن عيني و قلبي معاك

كإني شايفك.. كإنك شايفني

مشيت و معاك الذكريات

حكاوي اللي راح و كل اللي فات

فاكر أيام زمان؟

أيام الصبا و الجنان..

فاكر أيام الشباب

و لِعب الكورة على التراب

فاكر جنينة الفردوس؟

حتة من جنة ذكرياتنا..

و فيها زادنا..

و فيها عيشة للنفوس.

فاكر حكاوينا..

لسة عايشة فينا

لسة بتفتكرنا

لسة بتحيينا.

إنت فينك من سنين؟

كلي ليك شوق و حنين

سايبني وسط الناس غريب

من غير حبيب..

من غير طبيب يداوي الجروح

هوّ كان يعني لازم تروح؟

كان لازم تشُق في الغربة طريق؟

كان لازم تسبني من غير أي شئ؟

و لكن مسامحك.

و من غير ما صارحك بقوللك:

العيب مش عليك.

العيب عاللي ده إسمه زمن.

على دي دوامة عايشة فينا.

بتاخدنا و تودينا..

و تفرقنا من غير تمن.

و أملي إن صبري..

يكون زي صبرك.. قوي و شديد.

ده قلبك من قوته شَق الحديد

و ف غربتك رسمت لينا طريق

طريق فيه معنى الرجولة..

فيه مشاهد من بطولة..

و ف أخره النصر جَي أكيد.

باكل فول و أنا بعوم

2007-07-08T12:33:00.000+02:00

بعوم بقالي كام سنة
جنب أهلك، جوة نيلِك
وسط ميت مليون هَنا
ده نيلك هو دمي
و كل حتة ف أرضك.. أنا
باعشق نسمة منك
نسمة حلوة توديني
و تاخدني من هِنا
ما هو إنت يا مصر زي روحي
بلسم جروحي
و برضه جوة قلبي
مهما تروحي
بَعُوم في نيلك و أنا فرحان
بانسى الدنيا و كل اللي كان
أحلام زمان
بس السحب عالي
و جوة نيلك موجود حيتان
موجود وحوش
موجود وشوش متجمدة
و شعب كله كدة
كبش الفدا
و اللي ف يوم كان هو القمر
أصبح حجر
خللي بالك
أصل نيلك صار طوفان
و أي حد حاول يعوم، أصبح مهان
ممنوع كلام
ممنع تعوم
ممنوع تفوُق
ممنوع حتى تنام
لازم تعيش غلبان
و تموت غرقان
و رغم الجِزَم والشوم
لازم تبتسم
و تقول كمان
آه
بقالي سنين فاكرني بَعوم
و فجأة نَفَسِي اتسحب
و أصرخ أقول
أنا باغرق يا مصر
يا بلد الفول

إعتراف

2007-06-30T23:58:00.001+02:00

في غربة الدنيا و حشتيني
و أنا شايفك كل يوم
من غير كلام
عينك في عيني
نفسي أقوللك حاجات كتير
و كلام كتير ماليني
ده أنا عندي ميت موال
و حكاوي ليالي طوال
و دموع ف سنين غريبة
و قلب حاله حال
نفسي مرة قلبي يقول
و منه يشيل
و ينطق باللي بيه مشغول
علميني أقول
علميني أشيل
ده اللي جوة ف قلبي سنين
علميني إزاي
أنسى اللي فات و حنيني
لأحلى زمان وديني
و ريني
كل اللي فات من عمري
أُعذريني
عالكلام اللي فيّ
على دموع لياليّ
ده إنت نور بيحييني
و روح الأمل جوايا
كل ثانية معايا
بتحميني
رغم السكوت فاكراني
و في الذكريات شايلاني
بأعترف
بإن طبعي أناني
لكن سكوتي عاش ف كل كياني
إعتراف
إني أنا منِّك
و إنك إنتِ عارفاني

الشرقية

2007-06-26T00:36:00.001+02:00

شغلني مؤخراً موضوع الهوية
أنا فلان و إنت فلان
كل واحد ولُه شخصية
كل واحد و لُه كيانه
كل شعب ولُه مكانه
كل دولة و ليها نيلها
وليها صوتها اللي يغنيلها
و ليها إحساس الوطنية
جِه الشاب فلان و هو جاي
يقوللي هاي و يقوللي باي
"و عليكم الهاي و الرحمة الإلهية"
إيه المياعة ياض ده هية
قول "سلام" كلمة رضية
قالوها طول السنين أجدادي
قالوها حتى مامي و دادي
مالها كلمة أبويا و أمي
كلمة حلوة حروفها دمي
مالها أكلة الملوخية
طعم بلدي و أكلة هنية
و للا لازم عشان تاكلها
تاكل معاها فراخ "بانيه"
إنت فاكر نفسك بيه؟!
ما تقول محمر و قول مشمر
و قول كل اللي نفسك فيه
ما هو اللي مات ما عشان إيه
مات عشان قلبه
غاب و ساب أصله
وساب أصولنا
و ساب فصولنا
و ساب لغتنا العربية
داب يا عيني ف أصل عينه
في التقاليد الغربية
و لا غربية و لا عربية
فانت قول هاي
أو حتى قول باي
أنا عن نفسي م الشرقية

جمعية الإنسان

2007-06-22T09:58:00.000+02:00

رحت أقدِم في جمعية الإنسان
بعد العذاب و الأسية
و سنين كتير منسية
قلت هو دة المكان
رحت أقدم ورقي
وأشوف نتيجة لعَرقي
و أملي إن الجمعية دية
تكون نهاية لزهقي
رحت لجمعية الإنسان
مشتاق لحنية و حنان
مشتاق إن حد يحس بيَة
و يقدرني كإنسان
بس رحت و رفضوني
"ورقك ناقص... من غير عنوان"
طب أجيب إيه دللوني
أنا لازم أبقى إنسان!
رحت جبت ميثاق ميلادي
وكل حاجة عن أجدادي
رحت جبت كل حاجة
تثبت إن أنا إنسان
"لسة مش مقبول"
ده كلام ده مش معقول!
ده أنا جبت كل شئ
و شهادة من كل صديق
و جبت من الجيران أساميهم
و صورت الناس في الطريق
جه الراجل يقوللي
"إنت ما ينفعش تبقى إنسان
أُخرج و اهرب في الحال"
طب ليه و حياتك قوللي
قاللي و يا ريته ما قاللي
"إنت طيب و ابن حلال"

الحلم الأخير

2007-06-21T00:37:00.001+02:00

نام و اتغطى بلحافين
و اطفي النور
و الشباك إقفله
و غمض عينيك الإتنين
و سيب الدوشة خليك ف حالك
إنت مالك
و لو الدنيا حتى اتبدلت
خليك مكانك
خليك ف نومك
و انسى يومك
و انسى قلبك الحزين
إنسى إنك من غير حقوق
بس إوعى تفوق
إوعى تفتح الشباك
إوعى حتى تبص فوق
خليك مغمض بين دنيتين
دنيا حلوة
دنيا حلمك
و بين دنيا تانية للمظلومين
سد ودنك إوعاك تخاف
شد اللحاف
إوعى تشوف
لَمصيرك يكون زي اللي شاف
خللي راسك عالمخدة
نام لحد اّخر النهار دة
و كمان يومين
نام لحد ما الدنيا تبقى بين نارين
ساعتها بس النوم يطير
و تعرف إن الحلم دة
كان هو الأخير

شكراً

2007-06-19T15:45:00.000+02:00

إزاي أقول شكراً و أنا إنسان
محدود بالكلام, محدود باللسان
إزاي كلمة شكر تكفِي دنيا تانية
إزاي أربع حروف يكفوا كل إللي كان
لو كان الشكر بيتعِطِى
لكانت عيني هديةو قلبي ليها غلاف
كنت أجيب نسمة شقية
كنت أجيب أدفى لحاف
كنت أجيب كل شئ جميل
مربى و عسل و ورود
و لون و شكل فصل الربيع
و ذكرى جميلة و صوت العود
و اّخد كل الحاجات ديَة
و أديها لأبويا وأمي
و أقوللهم ثانية واحدة
و أروح أجيب حاجات تانية
و أفضل أجيب و أجيب و أجيب
و بعدين أجيب و أجيب وأجيب
و أقوللهم خلصت الحاجات
خلص جمال الدنيا
و خلص كل شئ جميل
و خلص معنى الجمال
و فِضِل الشكر واقف
في نفس المكان على نفس الحال
أعمل إية يا ناس؟
أقطع نفسي؟
عايز أي حاجة
توفِي أبويا وأمي
إقتراحات؟

جئت إليك

2007-06-09T22:24:00.000+02:00

جئت إليك معتذراً
جئت أُرَوِىَ الثرَى
جئت إلى إله كريم مقتدرا

جئت ألوذ و أتوب
جئت إليك بذنوبٍ
تكفي كل الورى

يا إلهي.. جُد بعفوٍ
عبداً إليك قد جَرى
عبداً و غير نورك لا يَرى

جئت إليك أسألك
هل ستقبلني إلهي
عبداً ضعيفاً قد هَوى

هل ستقبلني
بعد ما كان
من زلاتٍ و ذنبٍ
قد ملأ الفضا

يا إلهي.. جُد بعفوٍ
عبداً إليك قد جَرى
عبداً و غير نورك لا يَرى

أنت ربي
أنا عبدك
مالي غيرك
من رحيم سواك

لا تكلني إلى نفسي
يا إلهي طرف عينٍ
و اجعلني في حماك

I'm Sorry

2007-05-25T20:48:00.000+02:00

I’m sorry.
I know it’s late, but here it is
Here is my feeling of guilt
With my eyes on the floor I say this.
I know I’ve hurt you,
Haven’t spoken to you,
But it stayed with me,
For a very long time,
How I wounded your heart
I didn’t realize that I only hurt mine.
I’m sorry.
It’s hard to say but it must be said
I have to say it so I can lay calm in bed.
Thinking about that day,
When I saw you cry,
Because of something I said.
I thought of every way,
Not to say sorry,
But here I am,
Taking the hard road,
Taking my heart on board…
A very long trip.
Taking my soul to yours,
To try to fix that rip.
I’m sorry again and again,
I will say it till the end,
Because who would want to lose,
A very good friend… ?

Introspection

2007-05-19T19:49:00.001+02:00

Who are you?
What are you doing in me?
Intruding my mentality?
No, I am a result of what you've become.
I… am… you.
Then why are you so different?
Your existence, I think it's an accident.
You say this because you do not understand me…
Or you.
The 'you' you are talking about
Has withered and died out.
It used to exist before you were changed.
Changed?
Yes, you have changed.
From the simple to the complex
A product of life's projects
From the inward to the outward.
How can you know this?
No one knows this but me.
Ha ha. I think you forgot
But I'll remind you why not
Shut your ears and listen with your heart:
I am you, and you are me.

I wish

2007-04-09T12:08:00.000+02:00

I wish you were here
For me to lean on you
For you to wipe my tear.
I wish you were close,
Guiding my way
Making sure I don’t stray
Making sure I am ready for the final day.
Holding my hand in times of struggle
Pulling me out from under the rubble.
I wish you could hear my words
My stories of life and hearts too cold
I wish you could hear my cry
Then see me laugh
Then watch me try.
I wish I had been there with you
To see how you were,
How you struggled for me to be
How you were a gift for humanity.
I wish I could hear you speak
Your words in my ears…
Your hand to give me strength when I’m weak
Your light to scare away my fears
I wish I had seen your face
So pleasant and delightful,
It made the moon live in disgrace
In your world of peace,
In your world of faith…
I wish I had been there.
After all, I’m back here again,
And I’ll be here till the end.
All that which I can do,
Is say ‘Peace Be Upon You’

Your Prayers

2007-03-24T22:04:00.000+02:00

All went down and things fell apart
This day would come, I knew it from the start
Cracks fill my mind and seize my heart
This time was sure to come, I had to be smart
My actions seemed right but turned to be wrong
The world seemed tight but soon had gone
I could see that I was falling, no longer strong
If it wasn’t for your prayers that kept me on
In that time when the light was dark
When tears and blood were the only spark
When memories come and go and leave their mark
That’s when I was glad I heard your words
So calming to my spirit, it settled down
Pulled me up from the deep before I drowned
They told me to reach up for the sky,
To keep my head held high.
Your words assured my heart that one day..
The last day..
I’ll be your crown
It was your prayers that kept me on

Conformity

2007-03-17T23:13:00.000+02:00

Who has become who?
You have become them.
Like a leaf on a stem
You say the same words,
Act the same way,
Walk the same roads,
And they’ll take you away.
Robbed of your identity,
You are someone no more
You are a mop for their floor
A knob for their door,
And nothing else.
No more you have sense,
You drink what they drink,
And study what they think,
Wear what they wear,
Get eaten by the same bear
Because you don’t see;
Blinded by their media
Your only encyclopedia
Believe what they say
Do what they do
Stay if they stay,
Until they become you.

2007-03-11T22:58:00.000+02:00

حال قلبك
إسمع صوتي الحزين و الآه
و قلبي الانفطر و تعبني معاه
ماشي وسط الناس
بس لوحدي
في بحر فكري
عايش جوه سري
ويَّا أغرب إحساس
دوشة من حواليَّ
كإني دنيا تانية
ساكتة مافيهاش إللا أنا
و ألامي اللي فيَّ
مين مرة حس بيَّ؟
و بص جوة عنيَّ
مين شاف جوة قلبي
و جس نبض حبي
ماتقولش إنك شايفني
ولا في يوم أبداً عارفني
ما تقولش إنك عارف و حاسس
باللي مصحّي جفني
و لما وشي بيبتسم
و الضحكة عليا ترتسم
و اخلّي كل الناس
الفرحة عليهم تتقسم
بيكون قلبي بعيد
في حتة مافيهاش كلام
في حتة وسط الظلام
وسط قلوب من حديد
وسط غابة هي الحياة
وسط مليون ألف آه
غير كل الناس ما شايفاه
و أبدأ أضحك من جديد

True Love

2007-03-07T22:54:00.000+02:00

Maybe I’ve never showed it, but I love u
In the movement of the day,
In the tiredness at night,
So many words I’d like to say,
But cant see which time is right.
If I don’t speak the words, I hope my actions do,
I hope u understand that I love u.
That every breath I take I would give to u,
Just to see u smile, just to see u laugh.
I’d follow u to every place ur at,
Because u’ve been there for me,
Never left me, nine months so strong,
Nine months I was ur life, now ur mine.
I’d die to let u live,
I’d take whatever u give.
Maybe I can borrow the beauty in the universe
The beauty of colors, birds and the sun.
I’d take this beauty and write with the clouds,
“From your beloved son”…

إ حلم

2007-03-07T22:36:00.000+02:00

إ حلم
إحلم و خلي الحلم يحلم
ده حلمك هو سر الحياة
دة حلمك ممكن يزيل الهم
و لدنيا تانية ياخدنا معاه
عيش في دنيا ما فيهاش إلا حلمك
تبص تلاقي حلمك معاك
حلمك يكون بيته في قلبك
و بيتك في قلبه و عايش هواك
أصل إللي مات مات عشان حلمه
نصيبه ما كانش زي إللي كان
أصبح حلمه فوق طاقته و حمله
فسابه و غاب و غار عليه الزمان
حلمك هو إنت مهما العمر طال
مهما الناس قالولك و مهما اليأس قال
مهما تعبت من المشوار
واشتد و حاربك التيار
إوعى تسيب في لحظة حلمك
دة حلمك حارس و فارس مغوار...

في ربع رغيف

2007-03-04T06:37:00.000+02:00

في ربع رغيف
سيبوني أرحل من هنا لمكان بعيد
مكان حلمت بيه و في يوم كنت فيه
حروح هناك و ابعتلكم منه بريد
لونه أبيض زي الشمس في يوم ربيع
زي صوت البلبل في الصبح البديع
ريحته زي الفل يطل من شباك البيت
على صوته كبرت هنا و ربِيت
اَه يا زمن يللي مشكلتك مشكلة
نهاتي إحنا برجوعك و رجوعك معضلة
بعيد زي المكان... غريب على اللسان
كبير في قلبي و قلبي بيك كبر
على شوفك و شوقك ياما كتير صبر
يا ناس كلامي مش أي حد ليه
كلامي للعايزه و حاسس بيه
كلامي للي مات و اللي قلبه ضعيف
كلامي يتحط بس في ربع رغيف
كلامي مجرد حروف عالورق
كلامي مش زي فعل و جد وعرق
بس خلاصة الكلام يا ناس
خدوني لمكان بعيد و خلاص
حتلاقو قلبي اللي انجرح
انشرح من بعد ما كان منداس