إكتب و لو حتى حرف
مسير الحرف يبقى كلمة
كلامك ده وقود للهمة
إحكي عن كل الظروف
من غير أي خوف..
إحكي عن أوقات الحروب
عن ناس عايشة جوة الكهوف
ما فيهاش حياة
ما عادتش سامعة و لا بتشوف
كفاية كلام عن السلام
بلاش أوهام
مافيش عالغصن واقف جوزين حمام
و لو حروفك عجِّزت.. إكتب كمان
إبدأ إجري بكلمتك
علِّي بيها همتك
مضى خلاص زمن الوقوف..
فيه وحوش إتحركت وسط الحروف
فيه حاجات إتغيرت رغم الأنوف
و واحدة واحدة..
حروفك هتكتر.. وتبقى ألوف.
يا خسارة على حاجات كتيرة
كان نفسي أقولها و ما قولتهاش
و ناس كتيرة ما كلمتهاش
يا خسارة على الأيام..
عدَّت عليّ و ما عشتهاش
و فات الأوان..
كل واحد راح لحاله
ما كان من زمان..
يا قلبي تعترف
و تقول من زمان.
تعترف بحبك أو بالأسف
فات الأوان
كان إللي كان
مات إللي مات و عاش إللي عاش
و ف قلبي عاش
كلام كتير كان نفسي أقوله
خسارة يا قلبي كان ليك تطوله..
خسارة يا قلبي كان ليك تعيش
خليك فكرها..
دموع كتيرة ما بتتنسيش
و حروف كتيرة ما قولتهاش
ما تلومش إلا نفسك
ما تلومش إلا قلبك..
خليك فاكرها و متنسهاش
لسة الورود متفتحة و فيها لون
لسة فيه رمش و جفون
لسة فيه صوت النسيم
لسة فيه إحساس عظيم
لسة فيه حاجات
و ذكريات من اللي فات
لسة فيه حكايات
لسة فيه شمس و قمر
لسة المطر
لسة الناس قلوبها حلوة
لسة غنوة
لسة صوت الديك بيدّن
و حاجات كتيرة حلوة جداً
لسة فيه حياة
و صوت قلوبنا سامعاه
بيقولّنا على بكرة جَي
لسة فيه ضَي
و يقولنا بصوت بشير..
لسة الدنيا فيها خير
أكون أو لا أكون..؟
أعيش و لّا لأ؟
أفضل ساكت و ساير...
ولّا أقول الحق؟
أنا أبيض و لّا إسود..
ولّا فيّ الف لون...؟
أكون أو لا أكون...
ألف سؤال مجنون
صَحّى قلبي في الليالي..
بكَّى عيني و خلّهالي..
تايهه ف غربة الكون.
أكون أو لا أكون..؟
لسة الدمع جوة العيون؟
و لّا الفرح بقى يتعزف..
على وَتَرِين من قانون
عايش في وسط دوشة...
و لّا راضي بالسكون؟
أكون أو لا أكون..
ألف سؤال مجنون..
ألف سؤال مجنون.
