دقيقة واقع

الواقع بتاعنا خشن زي الحجر..

حقيقة ما منهاش مفر.

طريق حياتنا..

من يوم ما جينا ليوم مماتنا..

بقى أصغر ممر.

مخدوعين ف شكل بكرة و لون بشرته

متشعلقين بخيط و فتلة..

و مشكوكين بإبرته.

آدي الشباب ملطوعين في الشوارع

مش هامهم أي كلمة و لا شرع شارع.

آدي الغني و آدي الفقير

دة عايش كدة و دة عايش هنا..

و الفرق بينهم أصبح كبير.

آدي الوشوش المتكتفة

من غير سلام من غير كلام..

و لا حتى ابتسامة متكلفة.

قاعدين..

مستنيين أي حاجة تهزنا.

أي شومة تدق راسنا..

وتفوقنا من وهمنا.

واقفين مكاننا من غير حراك..

في واقع ما منهوش فكاك.

في صورة متبروزة ببرواز رخيص

فيها ناس بتستهبل..

وفيها ناس بتهيص.

آسف إن كان كلامي عن واقعي..واقعي

و لكن هو دة حالنا

و مالنا بقى كل انشغالنا

و دماغنا سايقة ف هَبَلنا

و هي دى الحقيقة..

و هو دة للأسف كل واحد فينا.

و هي دي حياتنا

وهو دة واقعنا..

و دة ملخصه في دقيقة.