الشرقية

شغلني مؤخراً موضوع الهوية
أنا فلان و إنت فلان
كل واحد ولُه شخصية
كل واحد و لُه كيانه
كل شعب ولُه مكانه
كل دولة و ليها نيلها
وليها صوتها اللي يغنيلها
و ليها إحساس الوطنية
جِه الشاب فلان و هو جاي
يقوللي هاي و يقوللي باي
"و عليكم الهاي و الرحمة الإلهية"
إيه المياعة ياض ده هية
قول "سلام" كلمة رضية
قالوها طول السنين أجدادي
قالوها حتى مامي و دادي
مالها كلمة أبويا و أمي
كلمة حلوة حروفها دمي
مالها أكلة الملوخية
طعم بلدي و أكلة هنية
و للا لازم عشان تاكلها
تاكل معاها فراخ "بانيه"
إنت فاكر نفسك بيه؟!
ما تقول محمر و قول مشمر
و قول كل اللي نفسك فيه
ما هو اللي مات ما عشان إيه
مات عشان قلبه
غاب و ساب أصله
وساب أصولنا
و ساب فصولنا
و ساب لغتنا العربية
داب يا عيني ف أصل عينه
في التقاليد الغربية
و لا غربية و لا عربية
فانت قول هاي
أو حتى قول باي
أنا عن نفسي م الشرقية