Tuesday, June 19, 2007

شكراً


إزاي أقول شكراً و أنا إنسان
محدود بالكلام, محدود باللسان
إزاي كلمة شكر تكفِي دنيا تانية
إزاي أربع حروف يكفوا كل إللي كان
لو كان الشكر بيتعِطِى
لكانت عيني هديةو قلبي ليها غلاف
كنت أجيب نسمة شقية
كنت أجيب أدفى لحاف
كنت أجيب كل شئ جميل
مربى و عسل و ورود
و لون و شكل فصل الربيع
و ذكرى جميلة و صوت العود
و اّخد كل الحاجات ديَة
و أديها لأبويا وأمي
و أقوللهم ثانية واحدة
و أروح أجيب حاجات تانية
و أفضل أجيب و أجيب و أجيب
و بعدين أجيب و أجيب وأجيب
و أقوللهم خلصت الحاجات
خلص جمال الدنيا
و خلص كل شئ جميل
و خلص معنى الجمال
و فِضِل الشكر واقف
في نفس المكان على نفس الحال
أعمل إية يا ناس؟
أقطع نفسي؟
عايز أي حاجة
توفِي أبويا وأمي
إقتراحات؟

4 comments:

I am said...

أنس .. أنا فتح الباب
الأدب عموما والشعر والزجل خصوصا محتاج تلات حاجات:
شعور و احساس صادق بأمر معين
أفكار للتعبير عن الشعور ده
صياغة أو صناعة للألفاظ اللي بتخرج فيها المشاعر دي للكلام

أصعب حاجة ان الواحد يكون عندو حس فني و شعور بالمعاني و بالجمال اللي بيشوفوه

و ان يكون عنده أفكار يعرف يعبر عن شعوره من خلالها

أما الكلام و الصياغة اللفظية فدي , و ان كانت صعبة, فهي أسهل حاجة.. لأنها مكتسبة ممكن الواحد يتعلمها بسهولة

طالما عنده الشعور و الأفكار والحس الفني و الذوقي

المشاعر و الأفكار زي الروح .. والألفاظ والكلمات زي الجسد..

الروح بتسري في الجسد وتديلو معني..

انت ما شاء الله .. من غير أي مجاملة عندك حس فني راقي و شعور بالجمال..

و مبدع جدا في أفكارك للتعبير عن المشاعر دي

بس محتاج تحسن شوية الصناعة اللفظية و الموسيقية في الكلمات

و دي حاجة سهله.. ممكن تتعلمها بسهولة

أنصحك تقرأ أشعار كتير عشان تحسن الملكة دي..

ابدأ بأشعار نزار قباني.. اقرأها كلها

و ايليا أبو ماضي
..

بلاش تبدأ بأحمد شوقي أو البارودي.. اتقل عليهم شوية

وافضل اكتب برده.. بس اقرأ أكتر

انت موهوب و محتاج تنمي الموهبة دي

يا رب أكون أفادتك

أنس بن أيمن said...

جزاك الله خيراً يا فتحتي...أفدتني كتير.

Anonymous said...

you yourself is the best way to say shokran..eeh elgamal da??!!

أبو نضال said...

ما شاء الله يا أنوس...بجد مشاعر غزيرة اوى

و النصيحة بتاعة فتح الباب جميلة بس بما ان انت بتكتب زجل فحاول تقرأ لناس بتكتب زجل برده