أبجد

إكتب و لو حتى حرف

مسير الحرف يبقى كلمة

كلامك ده وقود للهمة

إحكي عن كل الظروف

من غير أي خوف..

إحكي عن أوقات الحروب

عن ناس عايشة جوة الكهوف

ما فيهاش حياة

ما عادتش سامعة و لا بتشوف

كفاية كلام عن السلام

بلاش أوهام

مافيش عالغصن واقف جوزين حمام

و لو حروفك عجِّزت.. إكتب كمان

إبدأ إجري بكلمتك

علِّي بيها همتك

مضى خلاص زمن الوقوف..

فيه وحوش إتحركت وسط الحروف

فيه حاجات إتغيرت رغم الأنوف

و واحدة واحدة..

حروفك هتكتر.. وتبقى ألوف.

خسارة

يا خسارة على حاجات كتيرة

كان نفسي أقولها و ما قولتهاش

و ناس كتيرة ما كلمتهاش

يا خسارة على الأيام..

عدَّت عليّ و ما عشتهاش

و فات الأوان..

كل واحد راح لحاله

ما كان من زمان..

يا قلبي تعترف

و تقول من زمان.

تعترف بحبك أو بالأسف

فات الأوان

كان إللي كان

مات إللي مات و عاش إللي عاش

و ف قلبي عاش

كلام كتير كان نفسي أقوله

خسارة يا قلبي كان ليك تطوله..

خسارة يا قلبي كان ليك تعيش

خليك فكرها..

دموع كتيرة ما بتتنسيش

و حروف كتيرة ما قولتهاش

ما تلومش إلا نفسك

ما تلومش إلا قلبك..

خليك فاكرها و متنسهاش

بخير الحمد لله

لسة الورود متفتحة و فيها لون

لسة فيه رمش و جفون

لسة فيه صوت النسيم

لسة فيه إحساس عظيم

لسة فيه حاجات

و ذكريات من اللي فات

لسة فيه حكايات

لسة فيه شمس و قمر

لسة المطر

لسة الناس قلوبها حلوة

لسة غنوة

لسة صوت الديك بيدّن

و حاجات كتيرة حلوة جداً

لسة فيه حياة

و صوت قلوبنا سامعاه

بيقولّنا على بكرة جَي

لسة فيه ضَي

و يقولنا بصوت بشير..

لسة الدنيا فيها خير

ألف سؤال مجنون

أكون أو لا أكون..؟

أعيش و لّا لأ؟

أفضل ساكت و ساير...

ولّا أقول الحق؟

أنا أبيض و لّا إسود..

ولّا فيّ الف لون...؟

أكون أو لا أكون...

ألف سؤال مجنون

صَحّى قلبي في الليالي..

بكَّى عيني و خلّهالي..

تايهه ف غربة الكون.

أكون أو لا أكون..؟

لسة الدمع جوة العيون؟

و لّا الفرح بقى يتعزف..

على وَتَرِين من قانون

عايش في وسط دوشة...

و لّا راضي بالسكون؟

أكون أو لا أكون..

ألف سؤال مجنون..

ألف سؤال مجنون.

أعقاب سجاير

في الشوارع في الحواري في المولات..

في كل حتة موجودين.

مترميين و منداسين

و مفعوصين تحت الشباشب

معندهمش أي صوت..

يقولو للماشي حاسب

مفحوتين و مطحونين..

مالهومش لزمة

ولا في الرخاء و لا وقت أزمة.

خانقين علينا و مخنوقين.

متفعَّصين.

متقطّعين.

باصِّين في وش كل واحد..

ما هما مرميين عالأرض..

مهريين مِالضرب.

زهئانين من الكرب.

غلبانين و متمسكنين.

أنا مش باوصف أعقاب سجاير..

أنا باوصفنا إحنا.. البني آدمين.

زمن الرجالة -- إهداء من الأسد العجوز

كان يا ما كان.. كان في حاجة إسمها رجالة

أيام الفرسان و الخيالة

أيام ما كان لسة فيه الفتوة

شايل نبوته على كتفه بقوة

أيام ما كان في حاجة إسمها السيد

يحكم بيته و يتقالّه يا سي السيد

و كان فيه كمان راجل هلفوت..

لكن برضه كان شايل نبوت

بيدافع عن عرضه و يقول توت توت

و كان فيه برضه الظالم و المفتري

بس الظلم كان بيروح..و بيفضل القوي

دلوقتي ما بقاش غير شعر بيقولوا عليه شنبات

و عيال بتقول خد و هات

و رجالة عايئة بتبرم شنباتها

و رجالة تايهة من غير نبابيتها

بس ماتقولش رجالة.. قول لا لا لا لا

ما خلا ص راح اللي راح يا رجالة

فتح الباب

هجمت عليّ همومي

مخلوق مخيف بسبع أنياب

كل حاجة عايشة ضدي

محدش عامللي أي حساب

محدش حاسسني و لا أصلاً فاهمني

ما فيش فيَّ حب و محدش كارهني

أنا مش فاهمني

و ف قلبي ساجنني

و جوايا ميت مليون كتاب

أنا كل واحد فينا

أنا كل إنسان مغلوب

أنا أي حد حس ف مرة إنه خاب

أنا أي حد ساكت و عايش في السكون

أنا أي حد أمله إنه يفتح باب

أحلام الطفولة

و احنا صغيرين قالولنا نعيش في الخيال

ما احنا مش فاهمين..

يعني.. لسة عيال.

عادي نحلم و عادي نسأل..

ما كانش فيه شئ محال.

و كبرنا.

و بقى عندنا عشرين سنة..

و شفنا الدنيا فيها الهنا.

فيها الكناس و الشيّال..

فيها المحتال

فيها الفارس و الخيال.

و ناس نايمة و ناس ماشية..

فيها ناس تايهة و ناس راسية.

و موتيسيكلاااات..

و نااااس...

و عربيات ماشية في الحارة اليمين..

و فجأة تكسر شمال.

فيها بتتحطم الآمال.

و ناس غرقانة ف دم و عرق..

و غصب عنها علشان تعيش..

ضميرها اتسرق.

و كل واحد متحيّر.

كل يوم بحالة و متغيّر.

صحيح الدنيا حلوة..

بس يا ريتني فضلت صغيّر.

حدوتة

بِندُور في حواريها

من حدوتة لحدوتة...

قصص ف قلوبنا منحوتة.

ما هي أصل الدنيا صغيَّرة.

مين كان يقول إن دروبنا هتلتقي..؟

بقالنا كتير.. و آدي القَدَر

زي إمبارح كنا تحت المطر.

و آدي الحياة..

دارت الدنيا و رجعنا لبعضنا..

و آدي حضن الحياة بيضمنا

أنا كنت فاكرك طول السنين

شكلك ما كانش واضح في ذهني..

بس لو شفتك هعرفك بين ملايين.

و لو شفتك ماقدرش أكلمك.

و مش هاقرَّب..

يدوب علي قلبي يرسمك.

ياه.. بقالنا قد إيه!

عشَر سنين؟

يمكن أكتر..

بس إنت زي ما إنت.

بس يمكن بقيتي أكبر.

يمكن بقيتي أَدرَى بدورة الحياة

يمكن عرفتي أكتر باللي كل واحد أساه.

و عرفتي برضه إن لقانا مش دليل على شئ

ممكن بكرة نفترق و نضل الطريق.

و حان وقت الوداع.

في سكوت..

مالهوش أي صوت..

و لا بالكلام..

ولا بالعيون..

ولا بالدموع.

و ممكن مايكونش أصلاً وداع..

ولا كان في لُقا..

و لا كان في أي شئ..

إلا ذكرَى..

و توتة توتة.

أي كلام

في دماغي وَش.

جوايا حيرة و ميت سؤال.

أحلام كتيرة و قُصر بال.

دبَّان في مخِّي مابيِتنَش.

حروف كتيرة مابتتقالش.

قفص بلاستيك و قِفله هَش.

و قشعريرة مليا جسمي

منسياني حتى إسمي

أجيب ف سيرة و أفُض سيرة..

و كله زَيِّي مابيفهمش.

آدي القصيدة

و لو إنت مافهمتهاش..

أبوس جبينك ما تسألش.

ما تفتييييش

لو سمحت..

هو الطريق منين؟

شمال أو يمين؟

أطلع فوق يا عم

ولَّا أنزل تحت؟

آه ما أنا رُحت الشارع ده

بس كان مسدود

كان فيه ناس دموعها واقفة عالخدود

..طب أَلِف الميدان؟

لأ ده باينلُه نفس المكان.

أنا شاكلي تايه.

بَلِف ف دواير.

و كل خطوة بامشيها..

بتزيد في الخساير.

.. طب حد معاه خريطة؟

إنت عارف؟.. ولّا بتزيط في الزيطة؟

ما بحبش إللي بيفتي.

كفاية هموم شايلها..

كفاية أحزان على كتفي.

ده أنا بس كل إللي عايزه.. لقمة عيش.

و أي حد يدلّني.. يا ريت ما يفتيش.

قبل الشروق

صحيني الساعة خمسة

أصل المنبه بتاعي مكسور

صحيني قبل الشمس ما تصحى..

قبل كل الناس ما تصحى

نفسي أشوف شكل الدنيا من غير نور.

أكيد هيّ أحلى..

و الخير بيها أولى..

من كل شر مستطير.

الصُّبح كل حاجة بتبان.

آدي الغني و أهو الغلبان.

و آدي اللي واقف في الطابور.

ما فيش حاجة بتستخبَّة.

كله على الأرض ف حجم حبَّة..

و كله ف دايرته بيدُور.

إللي عايز يقول بيقول.

و إللي ساكت ساكت.

عمره ما قال و لا هيقول.

الحرامي إتمسك.

و آدي إللي حقه إتهتك.

و آدي إللي حاله مستور.

صَدَق إللي قال من زمان..

كله مكشوف في النور.

يا رب

يا رب إنت عالم بحالي

بقدرتك يا قدير

تقدر تغير كل أحوالي.

يا خالق كل شئ..

و مخللي ف كل شئ..

شئ من بَلاء..

صَعب عليّ الإبتلاء.

غيّر لي أحوالي.

عايش في نعمتك..

و ناسي كلمتك

و بحكمتك و قدرتك أنا لسة موجود..

مليان عيوب..

غرقان في الذنوب.

و لسة واقف على باب رحمتك..

غّير لي أحوالي.

خليني أشوف لمحة من صلاح..

لسة في أمل؟

ولا كل الأمل راح؟

إمتى يا ربي هبقى مرتاح؟

يا رب أنا خونت عهدك..

و كنت خاين نعمتك

أنا بين إيديك ذليل..

قلبي خاشع لقوتك..

عيني مذلولة ف عزتك..

إقبلني عندك يا رحيم..

و برحمتك..

إكتب إسمي ف جنتك.

لون جديد

النهاردة عيد!

و كانت هديتي منه..

لون جديد.

و نظرة تانية للحياة..

مش بس بَص على المأساه

لأن فيه وجه تاني..

الوجه السعيد.

و مع قدومه العيد قاللي عالأمل..

كلمتين حب و زجل..

و مشاعر ف شكل تاني..

و إحساس من نوع فريد.

كل واحد منا بيفرح..

و أنا بفرحتي فرحان..

و دة حال كل إنسان.

مين فينا ما فيهوش البسمة؟

مدفونة..

عايشة جوة ف مكان بعيد..

مهما كان قلبك حديد..

جواك حتَّة من رسمة..

ولما تجِف كل حاجة..

هتلاقي على قلبك النسمة..

بتقول و ماليها شوق..

أهلاً و سهلاً بيك..

أهلاً بِلُون العيد.

أنا الشهيد

مش نادمان على أي حاجة عملتها
و لا إني مت ف سبيل الله.
و لا إني عشت لفكرة عرفتها..
و فهمتها..
و عشان إيماني بيها سبت الحياة.
أنا إللي مش ممكن أبداً أموت
لأإني هنا في مكان جميل
مليان جواهر مليان ياقوت..
ملين حاحجات كتيرة بحبها.
أنا هفضل عايش ف قلوب الناس
و ف كل حتة عشت فيها..
و ف كل حتة رحتها
أنا إللي دمي كان سطور..
كتبها و بحروف من نور..
قصص بطولة مُخلَّدة.
أنا إللي روحي كانت فِدا.
و عشان إلهى طلبها مني.. قدِّمتها.
و إنتي يا أمي ما تزعليش..
أنا مش قولتلك قبل ما أمشي..
"لازم ها عيش.."
و فيها إية لو روحي كانت هيّ التمن..
و فيها إيه لو قلبي خلِّدته طول الزمن.
يا أمي..
ضحيت عشانك و عشان ولادك
ضحيت عشان الظلم خَد بلادك
يا أمي..
ما تروحيش عند قبري..
سيبيه وحيد..
ما تذرفيش عنده الدموع..
ما تقِيدِيش في ذكراىَ الشموع..
بس احكي عني للشباب..
صحِّي بيَّ شعب غاب..
و قوليلهم نفسي أرجع للدنيا تاني..
و أتقِتِل ألف مرَّة بسيف حديد..
و روحي تكون تاني الفدا..
قوليلهم إني أنا الشهيد.

قلبي معاك

أنا عايز أقولك و بصراحة

بس حط همّك على جنب

و خدلك من الدنيا استراحة.

و اعذرني لو كلامي غريب

أو مايجيش غير من قريب

بس خد منّي كلامي..

كأنه من حبيب لحبيب:

قلبي معاك.

و حاسس بكل حاجة شاغلاك

و همّي هو همّك..

و اللي جوايا جواك.

قلبي معاك.

و كل كلمة مكتوبة طالعة من قلبي..

من قلب قلبي

و كل حرف منها جَس نبضي

أصلك إنت مهما كان برضه صاحبي.

من نظرة عينيك بشُوف كل حاجة..

ماتقولش حاجة..

من غير ما تتكلم.. عيني سامعاك.

من غير ما تتألم.. روحي حسّاك

أصلك إنت مهما كان برضه صاحبي.

و شِق قلبي.

و نور حياتي و كل حبي.

دة احنا بينّا عِشرة سنين..

وكل يوم فيهم لوحده بسنين.

و ف كل لحظة كان قلبي معاك

مشغول بهمّك..

فرحان لفرحك..

و ف كل خطوة كان خطوة وراك.

ما تستغربش يا نص نفسي..

مش كل الحب مجنون و ليلى..

مش كله لازم يبقى رومانسي

دة المولى سبحانه وصّى عليك

و ديني قاللي أبقى أخوك.

و إن قلبي يبقى معاك.

و أملي إن في الجنة تبقى..

زي ما في الدنيا قلوبنا..

و تبقى إنت يا صاحبي صاحبي..

و يبقى برضه قلبي معاك.

دقيقة واقع

الواقع بتاعنا خشن زي الحجر..

حقيقة ما منهاش مفر.

طريق حياتنا..

من يوم ما جينا ليوم مماتنا..

بقى أصغر ممر.

مخدوعين ف شكل بكرة و لون بشرته

متشعلقين بخيط و فتلة..

و مشكوكين بإبرته.

آدي الشباب ملطوعين في الشوارع

مش هامهم أي كلمة و لا شرع شارع.

آدي الغني و آدي الفقير

دة عايش كدة و دة عايش هنا..

و الفرق بينهم أصبح كبير.

آدي الوشوش المتكتفة

من غير سلام من غير كلام..

و لا حتى ابتسامة متكلفة.

قاعدين..

مستنيين أي حاجة تهزنا.

أي شومة تدق راسنا..

وتفوقنا من وهمنا.

واقفين مكاننا من غير حراك..

في واقع ما منهوش فكاك.

في صورة متبروزة ببرواز رخيص

فيها ناس بتستهبل..

وفيها ناس بتهيص.

آسف إن كان كلامي عن واقعي..واقعي

و لكن هو دة حالنا

و مالنا بقى كل انشغالنا

و دماغنا سايقة ف هَبَلنا

و هي دى الحقيقة..

و هو دة للأسف كل واحد فينا.

و هي دي حياتنا

وهو دة واقعنا..

و دة ملخصه في دقيقة.

إنسان غير كامل

بقالي كتير بَلِف و أدُور
قاعد حيران مش عارف أنام
بسأل إمتى هييجي الدور
و أعرف نَفسي..
جوايا.. و ألاقي النور.
أفهم سرّي و أحطم
قيود مسكاني و ألف سور.
أعرف بس إيه اللي فيَّ
شوك و وحوش..
ولاّ زهور.
و لاّ إيه بالظبط عايش جوايا..
و واخده معايا..
فكرة خير و لاّ بس خطايا.
نفسي أفهم قلبي و أقول..
و أتكلم وياه و نقول
و أعرف من كلامي..
إن كنت سائل أو مسئول.
و لاّ الخوف ملكني خلاص
و وقع الفاس من زمان..
و شق طريق في الراس.
و لاّ لسة الأمل موجود..؟
عايش في نفسي من غير قيود
مات و لاّ لسة؟
لسة همسة؟
لسة فكرة؟
و لاّ راح م الوجود.
لسة فيَّ أي حاجة؟
أي نقطة أي حاجة؟
و لاّ جفِّت كل حاجة..
و ما بقاش إلا السكوت.
ما بقاش إلا ثانية..
مستنّيها عشان أموت...
عشان أعيش.
و لاّ الحكاية زي ما قالوا
من زمان ما بتتنسيش.
و لسة جوايا السؤال
و طول ما أنا عايش..
هيفضل معايا...
هيفضل معايا.

إلى مُغترب

إزيك.. إنت فين

واحشني.

بعيد بقالك قد إيه..

و لا لحظة مفارقني.

بعيد عن عيني و قلبي معاك

كإني شايفك.. كإنك شايفني

مشيت و معاك الذكريات

حكاوي اللي راح و كل اللي فات

فاكر أيام زمان؟

أيام الصبا و الجنان..

فاكر أيام الشباب

و لِعب الكورة على التراب

فاكر جنينة الفردوس؟

حتة من جنة ذكرياتنا..

و فيها زادنا..

و فيها عيشة للنفوس.

فاكر حكاوينا..

لسة عايشة فينا

لسة بتفتكرنا

لسة بتحيينا.

إنت فينك من سنين؟

كلي ليك شوق و حنين

سايبني وسط الناس غريب

من غير حبيب..

من غير طبيب يداوي الجروح

هوّ كان يعني لازم تروح؟

كان لازم تشُق في الغربة طريق؟

كان لازم تسبني من غير أي شئ؟

و لكن مسامحك.

و من غير ما صارحك بقوللك:

العيب مش عليك.

العيب عاللي ده إسمه زمن.

على دي دوامة عايشة فينا.

بتاخدنا و تودينا..

و تفرقنا من غير تمن.

و أملي إن صبري..

يكون زي صبرك.. قوي و شديد.

ده قلبك من قوته شَق الحديد

و ف غربتك رسمت لينا طريق

طريق فيه معنى الرجولة..

فيه مشاهد من بطولة..

و ف أخره النصر جَي أكيد.